SARDU
Comunu de Igrèsias: De su 1° a su 4 de mesi de ladàmini, cun tres diis de PreFiera (28-29-30 de cabudanni) torrat sa Fiera de su Lìburu de Igrèsias chi est arribada a sa de cincu editzionis. Ocannu po mori de s’emergèntzia sanitària si fait in s’atòngiu e non in is datas clàssica de su mesi de abrili.
Po arrispetai sa normativa anticovid sa Fiera est stètia torrada a assetiai, ma at a essi una cida dedicada a su libru e sa promotzioni de sa letura spainada in su tzentru stòricu de Igrèsias (in is pratzas Munitzìpiu, Picchi e La Marmora) cun unu programma ricu de atòbius, masterclass de formatzioni professionali, mostras, debatas, mesas tècnicas chi ant a essi a pitzus de su tema de sa Fiera chi ocannu est: “La Parola Crea Mondi”, su “Fueddu criat mundus”: sa podèri de su Fueddu de criai, donai sètiu e fintzas distruiri sa realidadi.
Ocannu funt cincu is comunus partener de sa Fiera: Igrèsias, Gonnesa, Portescusi, Santadi e Tzeddiani, ospitis in sa dii de abertura, in pari a is rapresentatis de s’Assessorau a sa Cultura de sa RAS, de sa Fondazione di Sardegna e de sa Scuola Allievi Carabinieri di Igrèsias. Medas is assòtzius natzionali presentis, intr’e custus sa FASI (Federazione Associazioni Sarde in Italia), “Circolo Sant’Efisio” de Torinu, “Associazione Le Nuvole” de Barcellona, Fidapa setzioni di Igrèias, “Casa Emmaus” e s ’”Associazione Elda Mazzocchi Scarzella” cun unu progetu de regota de lìburus in favori de is bibliotecas de is “Giardni Possibili”, Musei di Monte Arci, Museo Aquilegia, e su “Parco dei Cavallini della Giara” e su “Consorzio turistico per l’Iglesiente”.
Is òspitis: si incumentzat su primu de mesi de ladàmini in Igrèsias cun Antonio Manzini (Sellerio) chi at arrexonai cun Piergiorgio Pulixi, su 2 Andrea Marcolongo cun su libru nou in anteprima(“La Lezione di Enea” Laterza), Giuseppe Civati (People) su 3 e Gianluca Ales (Round Robin/SkyTg24) domìniga 4.
Medas is autoris presentis: Gianmichele Lisai (NewtonCompton), Roberta Balestrucci (Gallucci), e unus cantu autoris de su lìburu de s’istadi, sa regotta de contus “Giallosardo” (PIEMME) intr’e custus Ciro Auriemma e Francesco Abate chi est su protagonista de s’atòbiu de Radiofiera su 2 de mesi de ladàmini.
Annarita Briganti (Cairo editore, Repubblica) cun s’ùrtimu traballu suu “Alda Merini l’Eroina del caos” est sa protagonista de s’atòbiu chi si fait su 30 de Cabudanni in sa tonnara de Su Pranu in Portescusi.
Atentzioni manna a sa formatzioni cun 4 masterclass – una dònnia dii – tentas de professionistas: Piergiorgio Pulixi, Luigi Sanciu, Daniela Aretino e Stefano Lamorgese. Logu puru po su giornalismu de inchiesta cu s’incumentzu cun sa partnership de prestìgiu cun su “Premio Roberto Morrione” po su giornalismu investigativu under 30, po sa primu borta in Sardigna, rapresentau de su vice-presidenti, giornalista e redatori de Report Stefano Lamorgese.
Po s’àrea temàrica de sa Graphic Novel, ghiada de Daniele Mocci, ant a partetzipai is “Chine Vaganti” e ddoi at a essi sa mostra a in curu de s’artista Daniele Serra.
Torrat in prus “ La Casa degli Autori in Fiera” unu logu lìberu e abertu a su pùbblicu, de interatzioni, atòbiu e càmbia de ideas po totus is chi ant pubblicau un’òpera e dda bolint fai a conosci. Torrat fintzas “AltaVoce” (sa de duas editzionis) cun d-unu cast de ligidoris chi s’ant a esibiri in su palcu de su teatru Electra.
Nc’at a essi interatzioni meda fintzas po is ligidoris de s’’ArgoCircolo Letterario In Libro Veritas” sendi ca ant abertu un’àtera setzioni in Gonnesa e est acanta de nasci una setzioni puru in Portescusi. Ma ddoi at unu logu puru po is prus piticheddus (ArgoCircolo Letterario Fantadìa) a in curu de Erika Carta e sa Porcu cun eventus web e diretas in is diis de sa Fiera.
Atòbius professionalis de importu, dedicaus a s’editoria in Sardigna cun sa partecipatzioni de is editori Condghes e S’Alvure, e a “Fare RETE” cun sa presèntzia de Marco Belli po “Elba Book Festival”, Aldo Dalla Vecchia po “GialloGarda”, (fundadoris e partner de sa retza TetePYM de fieras e festival chi est nàscia pròpiu in sa de tres editzionis de sa Fiera de su Lìbru de Igrèsias) e Francesca Sapanu po su “Festival del Monreale”. Si serrat cun sa Paristòria Sinfònica “Pinocchio” sonada de sa Banda Verdi de Igrèsias.
Sa novidadi de ocannu funt is “mezus” de spainadura de s’eventu ca nd’at “bècius” e “nous”. Infatis de is diretas web in is canalis social de s’ “Associazione Argonautilus” e RADIOFIERA (duus apuntamentus dònnia dii in direta de is frecuèntzias de Radio Arcobaleno Iglesias) fintzas a sa difusioni via cavu in is arrugas de sa tzitadi. Maneras diferentis po abarrai sèmpiri agiornaus a su chi acuntessit in sa Fiera de su Lìburu de Igrèsias.
Sa Fiera del Libro di Iglesias® è est unu progetu de s’Associazione ArgoNautilus. Est parti de su “Maggio dei Libri” (initziativa de promotzioni de sa letura de su Cepell sigundu is auspìcius de Ministeru po is Benis e is Atividadis Culturalis) chi at bàliu po Igrèsias su tìtulu de “Città che Legge”.