SARDU
SPORTELLU LINGUÍSTICU
Su sportellu linguistico punnat a sighiri s’atividadi de sperimentatzioni de sa ex “Províntzia de su Campidanu de Mesu” e fait un’atividadi de consuléntzia, furriadura, documentatzioni e de comunicatzioni in língua sarda. Funt prevídius 10 sportellus, de custus 9 funt in is Amministratzionis Comunalis (Sportellu Cabufila est su de su Comunu de Biddacidru) e 1 sportellu est itineranti. Su sportellu linguísticu cabufila fait de giuntura intra de is sportellus linguísticus chi nci funt in su territóriu, coordinendi e fadendi pubricidadi a is atividadis cosa insoru ma proponendi puru progetus benidoris de cumpriri imparis. In prus tenit sa tarea de tenni is raportus cun is sportellus de is àteras Províntzias Sardas e de is Universidadis. Su Sportellu Itineranti, chi dipendit de su Sportellu Cabufila e trabballat imparis a custu, tenit pruscatotu sa tarea de prumovi s’atividadi de totus is sportellus linguísticus de sa Províntzia andendu de tanti in tanti in dónnia territóriu po trabballai imparis cun is Istitutzionis Scolàsticas de su territóriu, cun is Assótzius e cun is Impresas.
Giai chi su sistema linguísticu sardu tenit variantis diferentis is operadoris de sportellu funt in gradu de assegurai cumpeténtzias chi riguardant pruschetotu sa varianti campidanesa chi est caraterística de custu logu. Giai chi sa varianti umperada in sa Províntzia de riferimentu est sa campidanesa, in sa furriadura de is documentus de pubricai in su sportellu “on line” si donat precedéntzia pruscatotu a custa, ma non si escludit sa possibbilidadi de furriai is setzionis printzipalis de su sportellu “on line” in is àteras variantis linguísticas puru.
S’atividadi de comunicatzioni fata de su sportellu linguísticu bessit ancoras prus de profetu giai chi sa Províntzia apariciat sa pubricatzioni, in su giassu cosa sua, de documentus, nobas, sceras e acàpius útilis po sa connoscéntzia de sa língua sarda, e giat un’atividadi de consuléntzia e furriadura puru cun ainas telemàticas. S’operadori podit respundi a is preguntas de is umperadoris puru po médiu de posta eletrónica.
Custu cumportat unus cantu bantaxis:
- Evitat a is umperadoris de andai a su sportellu;
- Permitit a s’Enti de donai unu servítziu chi andat addia de s’oràriu de abertura de su sportellu ( gràtzias a sa pubricatzioni de documentus e nobas “on line” chi si podint castiai 24 oras apitzus de 24;
- Permitit de fai un’atividadi de comunicatzioni e spartzinadura po is umperadoris de totu sa Sardigna e po is chi funt in Continenti o a foras de s’Itàlia ( in cunsideru puru chi sa língua sarda est ogetu de stúdiu in medas Paisus stràngius).
TAREAS CHI SA PROVÍNTZIA DE SU SUD SARDIGNA SI PROPONIT DE SODIGAI PO MÉDIU DE SU SPORTELLU LINGUÍSTICU:
- umperu paritàriu de su sardu e de s’italianu;
- afortiai su “status” e s’umperu de sa língua sarda in su cuntestu de is atividadis acapiadas a sa vida de dónnia dí, cumenti a cussas frunidas de sa Províntzia;
- afortiai su "status" e s'umperu de sa língua sarda in su cuntestu de is atividadis amministrativas;
- fruniri atividadis de consuléntzia po furriaduras e elabboraduras de unu léssicu nou;
- fai rexinai e svilupai in is umperadoris de is servítzius frunius de sa Províntzia e in is dipendentis sa cusciéntzia de s’identidadi culturali cosa insoru e su santidu de apartenéntzia a sa comunidadi innui bivint.
Is Comunus alleaus de sa Províntzia Sud Sardigna in su progetu “ Sighidura de sa sperimentatzioni linguística de sa Províntzia de su Campidanu de Mesu” funt:
- Comunu de Biddacidru;
- Comunu de Seddori;
- Comunu de Gùspini;
- Comunu de Serrenti;
- Comunu de Pabillonis;
- Comunu de Mara Arbarei;
- Comunu de Giauni;
- Comunu de Gèsturi;
- Comunu de Biddanoa de Forru;
- Sportellu Itineranti.
Su dinai finantziau de sa Ras (Regioni autònoma de Sardigna), cunformas a sa L. 482/99, art. 9 e 15, po s’atitividadi de is sportellus est de € 21.252,00, duncas po dónnia sportellu s’est impignada sa somma de € 2.125,2.
In custu momentu funt ativus is sportellus chi sighint: